توفي الشاعر العراقي الشعبي جليل صبيح، اليوم الأربعاء، بإحدى مستشفيات العاصمة بغداد بعد صراع طويل مع المرض.

ونعى العديد من الشعراء والإعلاميين على منصات التواصل الاجتماعي الشاعر جليل صبيح الذي وافته المنية إثر مرض عضال.

وفي وقت سابق، أجرى صبيح عملية جراحية على إثرها تدهورت حالته الصحية.

وجليل صبيح شاعر وصحفي ومعد برامج واكب العديد من الأسماء الكبيرة في الساحة الشعرية العراقية أبرزهم كاظم الكاطع وعريان السيد خلف وسمير صبيح وله قصائد رائعة ويتغنى بها الجمهور.

قصيدة "جسر الجمهورية صديقي"

جسر الجمهورية صديقي
بس خاصمته أربع سنوات
مرات أجي يمه وما شوفه
ومرات بنص بيتي ايبات
صدفه من السعدون أتمشه
وشفته كبالي

جسر الجمهورية شلونك؟؟
أهلاً كلي وإجه وياي
إّوّصه صديقه السنك اليمه
كله يعبر السيارات
ضم اعتابه بروحه وكلي
معزوم انته ولازم
نكعد بـ(الغابات)
جانت جمعه وكل الناس
كل واحد حيانه بكاس
وصعدت نشوة كاسه براسه
وسولف عن دجله وإحساسه
كل صبحية يغازل دجله
ويحبها وناوي يودي أهله
ومحتار بقلقه أووهواسه
كتله احجيلي همومك كلهن
فرغ من صدرك وانكتهن
آني جليل ولازم تكد ــــ!!!
بسك كال واسمع مني
بيوم أغبر تيهت اسمه
وصوته ولونه أو وجهه ورسمه
جانت فوكي اشجم سيارة
ولن صوت يصيح ياساتر
وصافرة إنذار تدك غارة
وأدري عليه وحدس براسي
يكلي عليك
مبنى التخطيط اهتز كله
ونصب الحريه اهتز كبله
وشاعرنا التمثاله امطين
إبو نؤاس
استأذن من الشارع واسمه
وترك الكاس
بذاك البرد تغطه بدجلة
مبنى التخطيط اهتز كله
ودنكاتي تصيح اخفض راسك!!
اخفض راسي؟؟
ليش وإلمن اخفض راسي؟
دنكاتي تصيح
اخفض راسك.. اخفض راسك..
اخفض راــــ!!
وانته احجيلي؟
شيصير بلحظتها احساسك؟؟
لومحبوبة كلبك دجلة
مبتسمتلك بآخر لحظات من أنفاسك
شيصير بلحظتها احساسك؟
لو رجليك الواكف بيهن مبتورات
إوكعن يمك ...لا ربعك يمك لاناسك
شيصير بلحظتها إحساسك؟
لو إيدك مرعوبة وتصرخ
تتلمس تبحث عن راسك
شيصير بلحظتها احساسك؟
إترك هالموضوع ارجوك
وبصحتك يله ارفع كاسك
وارفع كاسي
ولن صوت أمي تصيح غفلة
طيف اسم الله
حلم اسم الله
ليش وليدي تعذّب حالي؟؟
كتلك من تنام اتغطه
وارجع هسه لنفس النقطة
ها صدكتوا:
جسر الجمهورية صديقي